ब्रेकींग: भीषण अपघातात १२ शिक्षक जखमी;चौघांची प्रकृती चिंताजनक

यवतमाळ : ट्रकने ट्रॅव्हलर ला धडक दिल्याने जिल्हा परिषद शाळांमध्ये कार्यरत असलेले १० ते १२ शिक्षक जखमी झाले. त्यापैकी चौघांची प्रकृती चिंताजनक असून त्यांना यवतमाळ जिल्हा रुग्णालयात हलविण्यात आले आहे. हि घटना घाटंजी–पांढरकवडा मार्गावर आज बुधवारी दि. २० ऑगस्ट रोजी संध्याकाळी सहा वाजताच्या सुमारास घाटंजी शहरापासून दोन किलोमीटर अंतरावर असलेल्या रसिकाश्रय संस्थेजवळ घडली. 

यवतमाळ येथून अर्ली–भीमकुंड मार्गावर शिक्षकांना घेऊन जाणारी ट्रॅव्हलर (क्र. एमएच ३० एए ५६०२) घाटंजीकडे येत असताना विरुद्ध दिशेने भरधाव वेगात येणाऱ्या ट्रकने (क्र. एपी ०१ व्ही ८२८२) समोरासमोर धडक दिली. धडकेचा जोर एवढा प्रचंड होता की ट्रॅव्हलरचा अक्षरशः चुराडा झाला. या भीषण अपघातात अभिजित बनसोड, नितीन राठोड, दीपक पाथरडकर, विवेक मोरस्कर गंभीर जखमी झाले , असून त्यांच्यावर यवतमाळ जिल्हा रुग्णालयात उपचार सुरू आहेत. तर रत्नमाला नैताम, रितेश वाघाडे, मानीबाई गिनगुले यांच्यासह इतर जखमींना घाटंजी ग्रामीण रुग्णालयात दाखल करण्यात आले आहे. ट्रॅव्हलर चालकही जखमी झाला आहे. या घटनेची माहिती मिळताच स्थानिक नागरिकांनी घटनास्थळी धाव घेऊन जखमींना रुग्णालयात हलवले. माहिती मिळताच घाटंजी पोलिस घटनास्थळी दाखल होऊन पंचनामा केला आणि वाहतूक सुरळीत केली. तपास पोलीस निरीक्षक केशव ठाकरे यांच्या मार्गदर्शनाखाली पोलीस उपनिरीक्षक शशिकांत नागरगोजे, कलीम शेख आणि संतोष मारबते करीत आहेत. दरम्यान, ट्रकचालकाला पोलिसांनी ताब्यात घेतले असून वृत्त लिहेपर्यंत या प्रकरणी गुन्हा नोंदविण्याची प्रक्रिया सुरू होती.