यवतमाळ : नगर परिषद निवडणुकीच्या तोंडावर यवतमाळ शहरातील प्रभाग क्रमांक ८ मध्ये महाराष्ट्र नवनिर्माण सेनेचा (मनसे) प्रभाव वाढताना दिसत आहे. विद्यार्थी सेनेचे जिल्हाध्यक्ष अभिजीत नानवटकर यांच्या नेतृत्वाखाली पक्षाने स्थानिक पातळीवर मजबूत जनाधार तयार केला असून युवक वर्गातून मनसेला उत्स्फूर्त प्रतिसाद मिळत आहे. प्रभागातील मतदारसंघात मनसेच्या प्रचाराची गती वाढली आहे. स्थानिक प्रश्न, रस्त्यांची दुरवस्था, पाणीटंचाई आणि घरकुलांच्या अडचणी यांसारख्या विषयांवर मनसे कार्यकर्त्यांनी थेट जनतेच्या प्रश्नांना आवाज देण्यास सुरुवात केली आहे. त्यामुळे मनसेच्या सभांना आणि बैठकींना चांगली उपस्थिती दिसत आहे. अद्याप पक्षाने उमेदवारीबाबत अधिकृत घोषणा केलेली नसली, तरी कार्यकर्त्यांमध्ये चर्चेचा विषय ‘मनसेचा उमेदवार कोण?’ हा ठरला आहे. पक्षाने जर युवा आणि सक्रिय उमेदवार दिला, तर मतदारांचा कल मोठ्या प्रमाणावर मनसेकडे झुकण्याची शक्यता राजकीय सूत्रांनी व्यक्त केली आहे.
दरम्यान, मनसेने जर शिवसेना (उबाठा) गटाशी युती केली, तर सत्ताधारी भाजपचे गणित बिघडू शकते. त्यामुळे प्रभाग ८ मधील निवडणुकीची लढत अधिकच रंगतदार होणार असून मनसेची भूमिका या वेळी निर्णायक ठरेल, अशी चर्चा राजकीय वर्तुळात रंगू लागली आहे.
0 Comments